နာမ်ႏ

သꩻအဝ်ႏသꩻအဲဉ်တဝ်း၊ ဒြပ်အဝ်ႏဒြပ်အဲဉ်တဝ်းသီး အမိဉ်ꩻမန်ႏသမျယို ဝင်ꩻဟဲ့ꩻ"နာမ်ႏ"နောဝ်ꩻသွူ။

အနက်အဓိပ္ပာယ်ႏအလꩻ နာမ်ႏအောဝ်ႏ ၄ မျိုꩻသွူ။

1. နာမ်ႏဆဲင်ႏတဖြာꩻ
2. နာမ်ႏဆဲင်ႏအမျာꩻ
3. စိတ္တဇနာမ်ႏ
4. နာမ်ႏအွဉ်ႏနယ်အစုအဗူႏ

မိဉ်ႏထွားနေဖျင်ယင်းတွမ်ႏ ထွို့ꩻဗူႏတယ်ႏဆို့ꩻပွုံႏအလွောက်ꩻနောဝ်ꩻ နာမ်ႏသံးအောဝ်ႏဖျင်ယင်း ၄ မျိုꩻသွူ။

1. နာမ်ႏမူလ
2. နာမ်ႏပေါင်ꩻစပ်
3. နာမ်ႏကြိယာႏ
4. နာမ်ႏအွဉ်ႏနယ်ဂွုဏ်ႏထီ

1. နာမ်ႏဆဲင်ႏတဖြာꩻ
   1. တဖြာꩻ၊ တပါꩻ၊ တဗာႏအတာႏ ကဖန်ခေါ်ခေါ်ဖေႏဒါႏအမိဉ်ꩻနောဝ်ꩻ ဝင်ꩻဟဲ့ꩻ နာမ်ႏဆဲင်ႏတဖြာꩻနောဝ်ꩻသွူ။

• ဥပမာႏ: ခြုံꩻ၊ ပွဉ်၊ ဧရာဝတီ၊ သစ်တောင်း။

ခြုံꩻ၊ ပွဉ်၊ ဧရာဝတီ၊ သစ်တောင်း ဖုံႏနောဝ်ꩻတဲ့ ခွုင်းခြောင်တန်ကအောဝ်ႏသော့ꩻ မျန်မာခမ်းထီအကိုခါႏ ကဖန်ဟဲ့ꩻခေါ်ခေါ်ခါꩻနေးဒါႏ ခြောင်တန်ယင်ဟန်ႏအမိဉ်ႏဖုံႏဒျာႏနေနေသွူ။

ဧရာဝတီကရိုꩻဒါႏ အမိဉ်ꩻယိုတဗာႏနောဝ်ꩻလဲ့ ရေႏမတ်ဟဲ့ꩻအီဒျာႏကွို့ꩻ မျန်မာခမ်းထီအခဝ်ထင်ꩻအကို မေခတွမ်ႏ မေလိခခြောင်ယိုနီလီး လင်ꩻခြွဉ်းငီꩻတဝင်ꩻတဲင် ထွတ်ꩻရွယ်ႏလင်ꩻနောဝ်ꩻတွော့ꩻ ကတွိုႏလင်ꩻသော့ꩻဒါႏ ဗဉ်းကလားပင်ႏလယ်ႏတန်ကို ခြောင်တန်ယိုတလီးအတာႏလွုမ်ꩻသွူ။ ဧရာဝတီကရိုꩻဒါႏ အမိဉ်ꩻယိုတဗာႏနောဝ်ꩻ တဆဲင်ႏပါတောဝ်း တွမ်ႏခြောင်တန်အလင်ဖုံႏသွူ။ ကွပ်ပွိုးနောဝ်ꩻမꩻတဲင် ဧရာဝတီယိုနောဝ်ꩻ ထွာနာမ်ႏဆဲင်ႏတဖြာꩻနုဲင်းနောဝ်ꩻသွူ။

အဗွိုန်ပီနုဲင်းနောဝ်ꩻနေနေ ခြုံꩻ၊ ပွဉ်၊ သစ်တောင်း ဖုံႏလဲ့ ထွာဒျာႏ ခြောင်တန်တဗာႏအတာႏ ကဖန်ဟဲ့ꩻခေါ်ခေါ်ဖေႏဒါႏ အမိဉ်ꩻဒျာႏတဲင်တွော့ꩻ ထွာဒျာႏ နာမ်ႏဆဲင်ႏတဖြာꩻနေနေသွူ။

• ဥပမာႏ: ရန်ႏကွုံႏ၊ မန္တလေꩻ၊ တောင်ႏကီꩻ၊ ဟိုပုံꩻ၊ သီႏသဲင်ႏ၊ ပင်လောင်ꩻ။

ရန်ႏကွုံႏကရိုꩻဒါႏ အမဉ်ꩻယိုနောဝ်ꩻ ရေႏမတ်ဟဲ့ꩻဖန်ဒျာႏ ခြောင်တန်လုဲင်တွမ်ႏ ခြောင်တန်ပသွန်တောင်၊ ခြောင်တန်ပကိုꩻဖုံႏ ခွဲကျွုံႏရာꩻအရပ်ကိုကအဝ်ႏဒါႏ ဝေင်ꩻတန်ယိုတဖြုံႏအတာႏလွုမ်ꩻသွူ။ ရန်ႏကွုံႏကရိုꩻဒါႏ အမိဉ်ꩻယိုနောဝ်ꩻ တဆဲင်ႏတောဝ်းတွမ်ႏ ဝေင်ꩻအလင်ဖုံႏသွူ။ ကွပ်ပွိုးနောဝ်ꩻမꩻ ရန်ႏကွုံႏနောဝ်ꩻ ထွာဒျာႏ နာမ်ႏဆဲင်တဖြာꩻသွူ။ အပီနုဲင်းနောဝ်ꩻနေနေ မန္တလေꩻ၊ တောင်ႏကီꩻ၊ ဟိုပုံꩻ၊ သီႏသဲင်ႏ၊ ပင်လောင်ꩻဖုံႏလဲ့ ဝေင်ꩻတဝေင်ꩻအတာႏ ကဖန်ဟဲ့ꩻခေါ်ခေါ်ခါꩻဒါႏ အမိဉ်ꩻဖုံႏဒျာႏတဲင် ထွာဒျာႏ နာမ်ႏဆဲင်ႏတဖြာꩻနေနေသွူ။

• ဥပမာႏ: မောင်ႏဗွုက်ꩻ၊ တချွုံꩻ၊ တပယ်ꩻ၊ သောလ၊ နင်ႏဗွာ။

မောင်ႏဗွုက်ꩻ ကရိုꩻဒါႏ အမိဉ်ꩻယိုနောဝ်ꩻ ဝွေꩻမွိုးဖါနီပါꩻ ရေႏမတ်ဟဲ့ꩻဖန်ခေါ်ခေါ်ခါꩻဖေႏဒါႏ ဝွေꩻတဖြာꩻအတာႏ အမိဉ်ꩻတဗာႏဒျာႏ။ မောင်ႏဗွုက်ꩻ ကရိုꩻဒါႏ အမိဉ်ꩻယိုနောဝ်ꩻ တဆဲင်ႏတောဝ်းတွမ်ႏ ဝင်ꩻပိုအလောင်ႏလင်ဖုံႏသွူ။ အပီနုဲင်းနောဝ်ꩻနေနေ တချွုံꩻ၊ တပယ်ꩻ၊ သောလ၊ နင်ႏဗွာဖုံႏလဲ့ လိုꩻတဖြာꩻအတာႏ ကဟဲ့ꩻဖန်ခေါ်ခေါ်ခါꩻဖေႏဒါႏ အမိဉ်ꩻဖုံႏဒျာႏတဲင် ထွာဒျာႏ နာမ်ႏဆဲင်ႏတဖြာꩻနေနေသွူ။